Deuteronomy 5

Imilayo elitshumi

1UMozisi wasebiza uIsrayeli wonke, wathi kubo: Zwana, Israyeli, izimiso lezahlulelo engizikhuluma endlebeni zenu lamuhla, ukuze lizifunde, linanzelele ukuzenza. 2INkosi uNkulunkulu wethu yenza isivumelwano lathi eHorebe ^a. 3INkosi kayisenzanga lesisivumelwano labobaba, kodwa lathi, thina sonke esilapha siphila lamuhla ^b. 4INkosi yakhuluma lani ubuso lobuso entabeni, iphakathi komlilo ^c, 5(ngema phakathi kweNkosi lani ngalesosikhathi, ukulazisa ilizwi leNkosi ^d; ngoba lesaba ngenxa yomlilo, kalenyukelanga entabeni) ^e isithi:

6NgiyiNkosi uNkulunkulu wakho, eyakukhupha elizweni leGibhithe, endlini yobugqili ^f.

7Ungabi labanye onkulunkulu phambi kwami.

8Ungazenzeli isithombe esibaziweyo, loba yiwuphi umfanekiso wokusemazulwini phezulu loba wokusemhlabeni phansi, loba wokusemanzini ngaphansi komhlaba. 9Ungakukhothameli, ungakukhonzi; ngoba mina iNkosi, uNkulunkulu wakho, nginguNkulunkulu olobukhwele, ngiphindisela ububi baboyise phezu kwabantwana, kuze kube sesizukulwaneni sesithathu lesesine sabangizondayo, 10njalo ngibenzela umusa abayizinkulungwane zabangithandayo lezabagcina imilayo yami ^g.

11Ungaliphathi ngeze ibizo leNkosi uNkulunkulu wakho; ngoba iNkosi kayiyikumyekela engelacala ophatha ibizo layo ngeze.

12Gcina usuku lwesabatha, ukulungcwelisa, njengokukulaya kweNkosi uNkulunkulu wakho. 13Insuku eziyisithupha uzasebenza, uwenze wonke umsebenzi wakho; 14kodwa usuku lwesikhombisa lulisabatha leNkosi uNkulunkulu wakho; ungenzi loba yiwuphi umsebenzi ngalo, wena lendodana yakho lendodakazi yakho lenceku yakho lencekukazi yakho lenkabi yakho lobabhemi wakho loba yisiphi sezifuyo zakho, lowemzini wakho ophakathi kwamasango akho, ukuze iphumule inceku yakho lencekukazi yakho, njengawe ^h. 15Njalo ukhumbule ukuthi wawuyinceku elizweni leGibhithe ⁱ, lokuthi iNkosi uNkulunkulu wakho yakukhupha khona ngesandla esilamandla langengalo eyeluliweyo ^j. Ngakho iNkosi uNkulunkulu wakho yakulaya ukuthi ugcine usuku lwesabatha.

16Hlonipha uyihlo lonyoko, njengokukulaya kweNkosi uNkulunkulu wakho, ukuze insuku zakho zelulwe, lokuthi kukulungele elizweni iNkosi uNkulunkulu wakho ekunika lona ^k.

17Ungabulali ^l.

18Njalo ungafebi ^m.

19Njalo ungebi.

20Njalo unganiki ubufakazi bamanga ngomakhelwane wakho.

21Njalo ungafisi umkamakhelwane wakho; ungahawukeli indlu kamakhelwane wakho, insimu yakhe, lenceku yakhe, lencekukazi yakhe, inkabi yakhe, lobabhemi wakhe, njalo loba yini ekamakhelwane wakho.

Ukwesaba kwabantu

22Amazwi la iNkosi yawakhuluma ebandleni lenu lonke entabeni, iphakathi komlilo, eyezini, lemnyameni onzima, ngelizwi elikhulu; njalo kayengezelelanga. Yawabhala ezibhebheni ezimbili zamatshe, yanginika zona ⁿ. 23Kwasekusithi lilizwa ilizwi livela phakathi komnyama ^o, lentaba ivutha umlilo, lasondela kimi, zonke inhloko zezizwe zenu, labadala benu, 24lathi: Khangela, iNkosi uNkulunkulu wethu isitshengisile inkazimulo yayo lobukhulu bayo ^p, lelizwi layo silizwile livela phakathi komlilo ^q; lamuhla sibonile ukuthi uNkulunkulu uyakhuluma lomuntu aphile ^r. 25Ngakho-ke sizafelani? Ngoba lumlilo omkhulu uzasiqothula. Uba siphinda silizwa ilizwi leNkosi uNkulunkulu wethu futhi, sizakufa-ke ^s. 26Ngoba ngubani enyameni yonke owezwa ilizwi likaNkulunkulu ophilayo likhuluma livela phakathi komlilo, njengathi, waphila ^t? 27Sondela wena, uzwe konke iNkosi uNkulunkulu wethu ezakutsho, usitshele wena konke iNkosi uNkulunkulu wethu ezakutsho kuwe, sizakuzwa, sikwenze ^u. 28INkosi yasisizwa ilizwi lamazwi enu ekukhulumeni kwenu kimi; iNkosi yasisithi kimi: Ngizwile ilizwi lamazwi alababantu abawakhulume kuwe; kulungile konke abakukhulumileyo ^v. 29O kungathi bangaba lenhliziyo enjalo yokungesaba, bagcine yonke imilayo yami, insuku zonke ^w, ukuze kubalungele labantwana babo kuze kube nininini ^x! 30Hamba uthi kibo: Zibuyeleleni emathenteni enu. 31Kodwa wena, mana lapha phansi kwami, ke ngikhulume kuwe yonke imilayo lezimiso lezahlulelo ozabafundisa zona, ukuze bazenze elizweni engibanika lona ukuthi badle ilifa lalo ^y. 32Ngakho qaphelani ukuthi lenze njengokulilaya kweNkosi uNkulunkulu wenu; lingaphambukeli ngakwesokunene langakwesokhohlo ^z. 33Lizahamba endleleni yonke iNkosi uNkulunkulu wenu elilaye yona, ukuze liphile ^aa, njalo kulilungele, libe seliselula izinsuku elizweni elizakudla ilifa lalo ^ab.